الذكرى الأولى على رحيل الفنان الكبير حسن كامي
كان في موقف حكاه حسن كامي الله يرحمه في التلفزيون زمان:
فبيقول ان لما عملوا مسلسل (ناس وناس) اللي كان فكرة احمد رجب ومصطفى حسين ، كان هو عامل شخصية (عزيز بك الأليت) وكان دائما يطلع بيتكلم عن السيجار والكافيار و"السيمون فيمية" ، في برنامج كانوا عاملينه ومستضيفين فيه ابطال المسلسل ، فأحمد راتب على سبيل الدعابة بيقول لهم : مرة عُمال من اللي شغالين في اللوكيشن سألوا حسن كامي : يعني أيه "سيمون فيمية"؟! ، فقال لهم : هقولكم بكره، وجه الفنان الجميل تاني يوم ومعاه 180 ساندوتش "سيمون فيمية" وكل الناس في اللوكيشن من أول أبطال العمل لعامل البوفيه، أكل "سيمون فيمية"
فالمذيعة ضحكت وقالت له:
كل الساندوتشات دي طيب ما كنت اشرح لهم وخلاص فرد عليها رد جميل جدا قالها: " ده أكل ما يتشرحش، لازم يدوقوه عشان يعرفوا هو إيه"
الحكاية دي لما عرفتها، شوفت أد إيه الفنان حسن كامي رجل طيب، جاب سندوتشات للعمال ولما كبرت أكتر فهمت اد ايه هو كان انسان راقي مش فكرة أنه طيب أو بيصعب عليه الناس.
الرقي هو شعور الإنسان بانسان زيه حتى لو كان بساندوتش "سيمون فيميه"
الله يرحم حسن الكامي الفنان الجميل .. ابن الاصول ❤
المصدر: Movies box
ليست هناك تعليقات:
إرسال تعليق